Central Young Lai Association hruaitute chuan, Lawngtlai atanga Tuipui Ferry kawng laitute chu, diktaka hna thawktur a ngenin, hna tha a awmtheih nan puih an ngaihna apiang ah Central YLA chu an inpeh reng tih an hrilh.
Lawngtlai leh Siaha inkar kawng, Lawngtlai atanga Chhimtuipui thleng a kawngpui sial that hna thawhmek chu vawiin khan Central YLA hruaitute chuan an President Pu HC Vanlalruatpuia hovin a hmun ah an en a, He kawng, Lawngtlai atanga Kilometres 10 hi zawhchhuak vek in, kawngpui sial dan ah duhkhawp loh lai an neih te, hnathawktu Vinco Construction hotute chu an hrilh a, Pu Robert Lalrinawma, Managing Director Vinco Construction chuan an hmalakna leh hmachhawpte Central YLA hruaitute chu a hrilhfiah a, fur ruahtui tlak hma hian Blacktop hna thawh hman an tum thu a sawi.
Tuipui Ferry kawng hi North East Special Infrastructure Development Scheme (NESIDS) pawisa Cheng Nuai 2587 seng a thawhmek niin, tundinhmun a hnathawhtur a ruahman atangin za a 60 thawhzawh tawh a niin, hnathawktu Construction Company te hian cheng Nuai 250 vel chauh an la dawng a, heti chung hian hripui leng kar ah a theih ang angin hna hi an thawhchhunzawm mek a ni.
Tuipui Ferry atanga Siaha lam kawng pawh siam mek niin, helai kawng hi siamzawh a nih a, Chhimtuipui ah Lei dawhkai a nih hun chuan, Lawngtlai leh Siaha inkar kawng chu nasa takin a tawi phah dawn a ni.
Tags
News