Kumin District Council inthlanpui neihtur chu Politics boruak aimahin, Hripui boruak a rit zawk ang tih hlauhthawnawm khawpin thil a inlumlet thei a, heivang hian Inthlanpui hmachhawnna mek hi, hri laka invenna ngaipawih chunga hmachhawn a tul khawp mai.
Vote zawnna lam ah hri hlau miahlo a awmtheih a, tunah pawh hetiang mi hi hmuhtur an awm chho tan tawh. Candidate leh an mahni puitute pawn, vote an zawnna ah, vote hmuhbelh an duhna leh hrilak a inven an duhna hi a kalkawp a tul a, hetiang a theih ang ang a fimkhur taka inthlanna hi hmachhawn a nih loh chuan, hripui hian kan rinphakbak hian min nuai ang tih hlauhawm tak a ni.
Sorkar lam chuan hrilaka fimkhurna a theih ang angin an kalpui a, Election duty turte pawh hrilaka fihlim vek an nihtheih nan Test vek an ni dawn a, hetihlai hian Political Party te, Candidate leh anmahni puitu lam ten, tlin duh luat ah hri thehdarhtu an ni thei tih an hriat a tul a, mipui lam pawhin tultawpkhawk a nihloh chuan tumdanga an lotihthin tamtak te pawh an tihloh ngam a tul viau dawn ani.
Roreltu tha tak tak thlang tling mah ila, hripui hian min nuai chiam si chuan, hmabak hi a ko viau dawn a, ngaihtuahfim mitinin hmang chungin, inthlanna hi inveng chungin i hmachhawn ang u.