Nimin khan Lawngtlai East Bialtu MLA Pu H. Biakzaua'n HSSLC 2020-a Lawngtlai District atanga topper-te chawimawi na a hlan
Kumin Higher Secondary School Leaving Certificate (HSSLC), 2020-a Commerce Stream-a Lawngtlai District atanga top ten-a lang mi pahnih chu nimin khan Lawngtlai East bialtu MLA, Agriculture Development Board Vice Chairman ni bawk Pu H. Biakzaua'n DC Conference Hall-ah chawimawina leh lawmpuina a hlan.
Zirlai ti tha, chawimawina hlante hi HSSLC 2020 Commerce-a pahnihna (2nd rank) Lalrintluangi, d/o MC Lalrokhuma, Lawngtlai-III leh pangana (5th rank) Lalremruatmawia, s/o L. Lalthangzauva, Sangau-I te an ni a. Pu H. Biakzaua hian anmahni chawimawi nan leh a lawmpuizia lantir nan, an zir zelna a an mamawh tur laptop a pe a ni.
Pu H. Biakzaua chuan zirna chu mihring chher puitling tura hmanraw tangkai ber a nih thu sawiin, sawrkar pawhin sikula zirna chu ngai pawimawhin, sum tam tak a dah tih a sawi a. Zirna kawnga theih tawp chhuaha bei thinte hlawhtlinna chu mi dang fuih phurtu leh entawn tur siamtu a nih avangin mi hlawhtlingte chuan chawimawi an phu a ni tiin, chu vanga chawimawina pawh buatsaih a nih thu a sawi a, Lawngtlai District atangin chawimawi tlak mi tam zawk lo chhuak se, a aia nasaa insen pawh a huam thu a sawi.
He hun hi Lawngtlai DC, Dr Andrew H. Vanlaldika, chuan kaihruaiin, Lawngtlai District-in chawimawi tlak zirlai chhuanawm a nei chu lawmawm a tih thu a sawi a. A bul tan that a pawimawh rualin, a tawp thlen loh a hlauhawm zawk tih sawiin, tuna an hlawhtlinna chu a bul tanna chauh a ni tih hria a, tumruhna petu leh anmahni nawr kaltua hmang turin hlawhtlinna chang zirlaite chu a fuih.
Tags
News