Phawngpui Tlang a thingzai chungchang ah YLA Sub Hqrs Sangau in thuchhuah an siam

         Tunhnai a Chanchinthar lam a thehdarh, Phawngpui tlang, Pangrang khawhlui bul ngawa thing awmte Forest Department hotuten an kihtirin an zaitir nia a sawi chungchang ah Young Lai Association, Sub-Headquarters Sangau chuan thuchhuah siamin pawi an tih thu leh heng thiltisualtute hi an dem takzet thu an tarlang. 

       An thuchhuah a tarlan a nih dan in, Young Lai Association chuan Phawngpui tlang a  nungcha  Thing leh Maute a humhalh tlat thin , heng ram rohlu  suasam leh Thing leh Maute an tichereu hi theihtawp chhuah in an do a, an lo venghimin an lo humhalh ve thin a ni.

        Phawngpui National Park  chhung Thing kih leh zai chungchangah hian Young Lai Association, Sub-Headquarters Sangau chuan thil thlendan a lo chhuizui a, he thing kih leh zai phenah hian thil fel lo tam tak a inphumru niin an hria a. Sawrkarin a  mawhphurhtu  chungah  dan ang in a na theih ang bera hremna a lek an phut a; lo inhnamhnawih ve an awm nia YLA ten an rinhlelh  chungchangah pawh sawrkarin a ranglama a chhuizui se an duh thu an thuchhuah ah an tarlang.

        Phawngpui National Park  chhung Thing kih leh zai chungchangah hian Young Lai Association, Sub-Headquarters Sangau chuan thudik ah chuan  an phak ang tawkin Sawrkar hmalakna an  thlawp zel dawn tih sawiin,   Mizoram sawrkarin he Thingkih leh zai chungchanga inhnamhnawih zawng zawngte  chhuichhuaka dan angin an chungah hremna lek se an duhthu an tarlang bawk. 

       

        An beisei anga hmalakna a awmlo a nih chuan Young Lai Association, Sub-Headquarters Sangau chuan a tuldan a zirin an bawhzui zel tur thu an thuchhuah ah chuan an tarlang tel bawk.