Niminpiah khan ZMC, Falkawn Laboratory-ah Covid19 hri kai leh kai lo mi 358 enfiah an ni a, Covid19 hri kai mi 23 hmuhchhuah a ni.
ZMC-a Covid-19 hri kai hmuhchhuahte hi an vaiin mipa vek an ni a. Assam Rifles sipai 22 leh tualchhung mi 1, Aizawl District-a mi vek an ni.
Assam Rifles Covid19 kai hmuhchhuah tharte hi kum 24 leh 56 inkara upa, ram chhung hmun hrang hrang atanga rawn lut an ni a, an zingah hian hri kai nena lo inhnimhnai Mizo pakhat tel ve a; inkhunghranna hmuna khunghran lai vek an ni a, Covid19 hri an kai tih anmahniah a lang chhuak rih lo.
ZMC Laboratory-a enfiahnaah hian ZMC Doctor, Covid-19 hri kaiin Futsal a khelhpuite leh an chhungte, inkhunghrang mekte chu hri lakah an fihlim tih finfiah a ni.
Heti hian Mizorama Covid-19 hri kai hmuhchhuah tawh zawng zawng chu 384 a ni a, heng zinga zaa 46.35, mi 178-te chu sipai an ni a; zaa 53.64, mi 206-te chu khawtual mi an ni.
Covid-19 hri kai zinga mi 193-te chu enkawl dam an ni tawh a; mi 191 enkawl mek an ni a, enkawl mek zinga zaa 80.10, mi 153-te chu sipai an ni a, zaa 19.89, mi 38-te chu khawtual mi an ni.Mizorama Covid-19 hri kai zaa 50.26-te chu enkawl dam an ni.
Nimin khan Mamit atangin Covid-19 hri kai naupang kum 3 mi leh naupang nu, Covid-19 hri kai rinhlelh vanga enthlak laite chu dam takin chhuahtir an ni a. Heti hian Mamit District chhungah Covid-19 hri kai enkawl mek an awm tawh lova; hri kai hmuhchhuah tawh zawng zawngte enkawl dam vek an ni tawh a ni.
Tags
News