Zangnadawmna phut vanga Land Owner hruaitute man chu, chhuah an ni tawh

       Kaladan Multi Modal Transit Transport Project hnuai ah Lawngtlai atanga Myanmar ram pawhtur a kawngpui sial mek in a tihchhiat a,  ramneitute intelkhawm, Lawngtlai District Land Owners Association hruaitu, mi pasarih te chu an President Pu H.Remmawia hova niminpiah a Lawngtlai Police ten an man chu nizan hmasa dar 9:30 vel khan chhuah an ni a, nimin khan Aizawl a Sorkar hotute dawrturin Land Owner Association hruaituten Lawngtlai an chhuahsan.

         Lawngtlai District Land Owners Association chuan zangnadawmna an hmuh ngei theih nan a hmalakna an neih mek chhunzawm nan, kawngpui sialtu Company te chu an hna chawlhsan turin an ti a, niminpiah khan  kawngpui dinhmun enfiah tur a an kal chu Police te hian man in,  Lawngtlai Police Station an hreng a,  Lawngtlai SP hovin  inbiain, KMMTTP hnathawktute, an hna chawlhsan tur a an tihna chu an sut hnu ah, Land Owner Association hruaitute hi chhuah an ni.

Zangnadawmna phut vanga, ram neitu intelkhawm ten hnathawh kallai an chawlhtir hi a vai a belkhawm in Ni 390  a tling tawh a ni.

         

Tarlan tawh thin angin KMMTTP zangnadawmna la pek loh hi Ram neitu intelkhawm ten an sawi danin mi 303 an la awm a, an pawisa hmuhtur hi cheng Nuai 5800 chuang a ni.