Hmasawnna nghialnghet nei tur a hmalak dan tur zirho a ni.

     

      Nimin khan Mizoram sawrkar Planning & Programme Implementation Department huaihawtin line department hrang hrangte tan Lawngtlai DC Conference Hall-ah hmasawnna ngelnghet nei tura hma lak hona tur (Sustainable Development Goal - SDG) chungchang zir hona (sensitisation workshop) buatsaih a ni.

He hun hi Lawngtlai Addl DC Pu K. Laltlawmlova'n a kaihruai a. P&PI Department-a Principal Adviser cum Additional Secretary Pu Saihlira chuan  Sawrkar chuan mipuite hnena sum pek mawl tawp a, an duh dan dana hmantir aiin, ruahmanna fel tak nena an mamawh rawn thlentute hnena an mamawh ang zela sum pek lam a kalpui tawh zawk tih sawiin, hmasawnna ngelnghet nei turin department hrang hrangte thawh ho that a, ruahmanna fel tak siam thiam a pawimawh thu a sawi.

He hunah hian SDG Consultant Pu C. Vanlalzawna leh Pu C. Lalnunmawia te'n powerpoint presentation hmangin SDG awmzia leh Mizoram dinhmun te, SDG-in a tum (goal) leh chu'ng a hlawhtlin dan tehna (indicator) hrang hrang te an sawi fiah a. Sawi hona hun hlawk tak hman  a ni.

Sustainable Development Goal hi kum 2015-a United Nations General Assembly-in khawvel ram hrang hrangte'n hmasawnna ngelnghet an neih theih nana kum 2030 hma ngeia an tihhlawhtlin tur 17 a ruahman a ni a. Hei hi India ram paw'n tihhlawhtlin tumin, state leh district hrang hrangte pawh hemi tihlawhtling tur hian hma la turin a ti a ni.