Compansation phut vangin Land Owners Assn. hruaitu mi 7 Police ten an hreng

         Kaladan Multi Modal Transit Transport Project hnuai ah Lawngtlai atanga Myanmar ram pawhtur a kawngpui sial mek in a tihchhiat a,  ramneitute intelkhawm, Lawngtlai District Land Owners Association hruaitu, mi pasarih te chu an President Pu H.Remmawia hovin nimin khan Lawngtlai Police ten an man.

          Lawngtlai District Land Owners Association te hian niminpiah khan Executive Committee kovin, zangnadawmna an hmuh ngei theih nan a hmalakna an neih mek chhunzawm nan, kawngpui sialtu Company te chu an hna chawlhsan turin an ti a, nimin khan an hruaituten helai kawngpui dinhmun enfiah tur a an kal chu Police te hian man in, an hriselna te endik an nih hnu ah Lawngtlai Police Station an hreng a,  Police hotute chuan Land Owners Association hruaitute chu Preventive Arrest an nih thu sawiin, hnathawhkallai tithuanawp zawnga hma an lak vanga hreng an nih thu an sawi.

            Hetiang a an hruaitute man an nih hnu hian Land Owners Association chuan , zangnadawmna chungchang ah High Court ah thubuai kallai a ni a, an hruaitute hren an nih chungchang ah Lawngtlai Police Station ah  FIR an thehlut.

 

             

KMMTTP zangnadawmna la pek loh hi Ram neitu intelkhawm ten an sawi danin mi 303 an la awm a, an pawisa hmuhtur hi  Nuai 5800 chuang a ni.