Sorkar chuan Mizoram State Health Care Scheme zawm theilo kohhran leh mimal enkawl damdawi in te chu empanelled hospital an nihna atanga bantir rih an nih tur thu nimin khan thupek a chhuah.
Mizoram sawrkar flagship programme SEDP hnuaia din Health & Family Welfare Board chu an chairman Health Minister Dr. R. Lalthangliana hovin nimin khan Secretariat Conference Hall, MINECO ah an thukhawm a. Hetah hian mimal leh kohhran enkawl Hospital te zinga MSHCS zawm theilo an la awm chungchang sawiho a ni a. Tun dinhmunah damdawiin 12 - Christian Hospital, Serkawn, Christian Hospital, Lawngtlai, Lairam Christian Medical Centre, Lawngtlai, Nazareth Nursing Home, Kolasib, Alpha Hospital, Aizawl, Med-Aim Adventist Hospital, Champhai, B.N. Hospital, Aizawl, Hope Hospital, Lunglei, Faith Hospital and Research Centre, Lunglei, J.C. Eye Hospital, Aizawl, Eye Care & Research Centre, Aizawl, Nazareth Medi-Tech Diagnostic & Care Centre, Aizawl ten MSHCS an zawm tawh thu tarlan a ni.
Kumin October ni 1 atanga hman \an Mizoram State Health Care Scheme (MSHCS), 2019 kalpui a nih dan leh dinhmun te an thlir ho bawk a, MSHCS Governing Board ruahmanna in AB-PMJAY leh MSHCS 2019 kalkawp tir tura ruahmanna kalpui mek a nih thu sawilan a ni a, a taka kalpui a nih hunah chuan AB-PMJAY rate in damlo inenkawlna senso do phalo mahse Mizoram State Health Care Scheme notified rate in a khaichhuak thei tura beisei a ni. MSHCS hnuaia inziahluh hun khar tawh pawh tunah hian hawn that leh a nih thu tarlan a ni a, a inziaklut thei chin zawng zawng inziaklut vek tura an duh thu an sawi a ni.
Health & Family Welfare Board thutkhawm ah hian SEDP hnuaia Board hrang hrangte hnathawh dan tur leh kalphung tur sawrkarin a ruahman "Terms of Reference" inhrilhfiahna hun hman a ni bawk.
Dr. R. Lalthangliana chuan MSHCS chu mipuite tan leh damdawiin lam tan pawh a harsatna thlenlo thei ang ber tura uluk taka ruahman a ni a ti a, AIDS vanga Mizoramin harsatna a tawh hi mi zawng zawngin an do let a tul a, hemi atana school, college leh university zirlaite, Kohhran hrang hrangte, Zirlai Pawlte leh Tlawmngai pawl hrang hrangte thlawpna sorkarin a hmuh tha chuan hma an sawnpui ngei ang tih a rintir niin a sawi .
Health & Family Welfare Board Vice-Chairman Dr. Z.R. Thiamsanga chuan mimal leh kohhran enkawl damdawiin thenkhat MSHCS la zawm ve theilo te chu a thalo lai te ennawn theih reng a nih a vangin tun dinhmunah zawm ve phawt turin a ngen a. Nimina thutkhawm ah hian Health & Family Welfare Board member te leh mithiam sawm bik te an tel a ni.
Tags
News