Lawngtlai ah Excise & Narcotics Deptt. thar, East, MLA Pu H.Biakzaua’n a hawng

        Lawngtlai East MLA Pu H.Biakzaua chuan November 8 khan Lawngtlai ah Excise & Narcotics Department thar a hawng.

Pu Biakzaua chuan Lawngtlai District in hmasawnna rahbi thar a chuangkai chu lawmawm a tih thu sawiin, Chief Minister leh Excise & Narcotics Minister te hmalakna chu fakawm a tih thu a sawi a, Lawngtlai District chu ramdang nen a ramri thutak nei a nih bak ah, ramdang nen a inkalpawhna tur pawh duan chhoh mek a ni a, ruihhlo lak ah Lawngtlai District chu a himlo viau thei tih sawiin, helam a hmalatutur Department hawn thar a ni chu ram mipuite tan a thlamuan thlak hle a ni a ti a, Department in chak zawka ke a pen theih nan Sorkar, NGO leh mipui lam ten theihtawp chhuahpui a tul thu a sawi.

Excise & Narcotics Department a Deputy Commissioner Pu Z.Lalhmangaiha kaihhruai, Department thar hawnna ah hian LADC a CEM, Pu T.Zakunga pawhin thusawiin, Lai District mipuite tan ni chhinchhiahtlak a awm belh chu lawmawm a tih thu sawiin, ruihhlo vanga tawrhna tamtak pumpelh a ni chho tur chu a lawmawm takzet a ni a ti. Chandmary Veng bialtu MDC Pu C.Lalsawmzuala chuan an veng chhungah Department thar tha tak an inbun chu lawmawm a tih thu a sawi a, an tha tichak tur a tangkaina a neih chuan theihtawp chhuah a inhuam thu a sawi.

         

Lawngtlai a Excise & Narcotics Station hawn tak hi Sub Inspector pahnih bak ah thawktu dang 15 ten an thutchilh phawt dawn a,  tihchangtlun chhoh zel tum niin, Office tan Lawngtlai-IV a Pu L.Z.Tluanga Building an luah.