Editorial | THIL MAWILO THEHDARH HI

  Social Media hmandan ah hian, chinchang hre deuh leh pa thlir thui deuh te chu, midangin an hmuh hniam theihna tur ang chi thehdarh kawng ah an fimkhurin, ka tithei alawm tih vanga hnam anga mualphona thlen thei hial a ngaih thehdarh a ni thin hi a veiawmin, zau zawka inzirtir a tul in a hriat a ni.

Tunhnai ah, thlalak hmuh nuam lemlo tak tak, insual lai thlalak a darh nual a, khatiang khan, hnam hnem a tibalin, kan hmai a belmang awm hrukfai tum lova, tahbelh duhtu an awm thin hi a vanduaithlak viauin a hriat a, hetiang lam hawi, thlalak a ni emaw, thu a ni emaw, thil mawilo, midangten min dahhniam a, min deusawh theihna tur ang chi thehdarh a ni leh thin hi a ngaimawhawmin, hetiang tih chingte hian an hawizawng an thlak a tul viauin a hriat a ni.

Smart phone humchung a che smart miahlote hian an smart phone chu hnam pawisawi nan an hmang tih an hriat a duhawmin, mahni inchhung a thil duhawmlo thleng, an hriat apiang, thanawmte hrilh chhawn chak tlatna rilru hi kalsan a hun tawh a, a chhelai siamthat kawng ah tan kan la theilo a nihpawn, a mawilolai thehdarhtu nihloh hi ram leh hnam tan a nasa taka hma kan lak theihna a ni.