Lok Sabha inthlanpui neihzawh takah khan Lawngtlai District ah hriattheih chinah Kum 100 chunglam mipahnihin vote an thlak.
Lawngtlai East Assembly Segment huamchhung, Pangkhua ah kum 116 mi ni a sawi, Pi Famiangi chuan April 8, 2024 khan an In lam ah Polling Party ten kalchilhin vote a thlaka, Pi Famiangi hian nikum November 7 a Assembly inthlanpui neih ah khan Polling Booth a kalin Vote a lo thlak tawh bawk.
Pangkhua Village Council Member te hnen atanga Lawngtlaia The Lawngtlai Post in thu a dawndanin, Pi Famiangi hi a EPIC ah chuan kum 1920 a piang anga ziahluh nimahse, EPIC siamlai vel hian a piankum diktak hriat a nilova, rinthuin a piankum hi dah a nih thu an sawi a, Pangkhua khawtlangin Pi Famiangi kum hi an theih ang anga kum upa lam te leh a fate bia a an chhutdanin kum 1910 hnulama piang chu nitheia an ngaihloh thu an sawi. Sorkar chhinchhiahna lama a landan chuan Pi Famiangi hi Kum 1920 April 7 a piang anga chhinchhiah a ni.
Lawngtlai West Assembly Segment huamchhung, Lawngtlai College Veng South Polling Booth ah Kum 104 a upa Pu Thanglianhluma College veng chuan April 19 khan vote a thlak a, Pu Thanglianhluma hi kum 1920 March 25 a piang anga chhinchhiah a ni.