Vawiin khan Startup India (DPIIT), Ministry of Commerce & Industry, Mizoram Startup Mission (MSUM) leh District Administration, Lawngtlai tangkawp buatsaihin DC Conference Hall-ah ‘TEJAS Initiative’ Engagement Programme hlawhtling taka hman a ni a. He hun hi Lai Autonomous District Council Chief Executive Member Pu C. Lalsawmzuala’n Khuallian niin a hmanpui.
Pu C. Lalsawmzuala chuan programme pawimawh tak mai Lawngtlai District mipuite tana buatsaih a ni chu lawmawm a tih thu sawiin, amah ngei pawhin Mizoram Startup Mission (MSUM) hmalakna hrang hrangte a lo la hmelhriat ngai loh thu leh hriatna thar neih nan a hlawk thlak atih thu a sawi a. CEM chuan a bik takin Self Help Group (SHG) member-te chu Nu an nihna anga inchhungkhur atanga ngaihtuahna seng tam tur leh taima taka hma la turin a chah a, Zirlai kalkhawmte pawh sorkar hna hian mi zawng zawng a daih vek dawn loh avangin mahni kuta ding chhuak thei tura inbuatsaih a pawimawh thu uar takin a sawi a, mi thil zuar chhawngtu ringawt ni lova, thil thar chhuaktu nih tum tlat tur leh vawiin programme chu hlawkpui ngei tum turin a chah.
He hun hi Pi Margaret J. Vanlalremmawii, SDO (Sadar) chuan a kaihruai a, Pu David Lalrinawma, Addl. DC chuan a khuh hawnna hun hmangin, Pi Ruth Chuauthangpuii, MSUM hnen atangin TEJAS hmalakna tlangpui ngaihthlak a ni.
He hunah hian startup ecosystem chungchang te, sorkar policy leh inkaihhruaina hrang hrangte zirtirna pek a ni a, entrepreneur-te tana hmasawnna tura kawng pawimawh tak tak leh hlawhtlinna kawng hrang hrangte zir ho a ni.
Chawhnu lamah entrepreneur-te tana masterclass neih chhunzawm a ni a, tah hian Supply Chain Management, GST leh bookkeeping chungchangte bakah Mizoram BanaKaih Venture Capital Fund leh One District One Product (ODOP) chungchangte chipchiar taka inzirtirna neih a ni.
He programme hlawk tak hi Pi Malsawmtluangi, Superintendent, DC Office-in lawmthu sawia kharin, Lawngtlai District chhunga department hrang hrang aiawhte leh startup lama tui mi tam tak an tel a ni.
Tags
News