RAMDANGMI NENA INCHIAHPIAH HI.

Thenawmram pahniha tualchhung buaina vangin Myanmar leh Bangladesh atangin Raltlan engemawzat Lawngtlai District ah an awm mek a, hengmite hi ngun zawka enkawl an ngaih thute, hnawksak an la nih maitheih thute chu mipuitling chin hmathlir a ni renga, Sorkar in Raltlan chhinchhiahna mumalzawka neih a tum hi a lawmawm a, a pawimawh zawk chu chhinchhiah an nih hnua an awmdantur   hi a nih a rinawm.

Tunhnai maiah Central YLA chuan Zochachhuah lam tlawhin thenawm ram nen insumdawn tawnna kalmek ah a phena thil diklo awmtheite a thlenloh nan hma an la a, a lawmawm khawp mai. Central YLA chetchhuah kher a ngai thin erawh Sorkar in a tihtur a titawklo a ngaitu an awm a nih pawn an thiamawmna chin a awmthei awm e.

Tunhnaia thlalak pakhat viral ah chuan Lawngtlai khawpui ah ramdangmi an awm nual tih a langa, kan incheina atangin thliar hran maitheihte thlengin zalen takin khawpui ah an vak kual tawh.

Hengmite hian phalna neiin dan hnuaiah mumaltakin rawnlut nisela chuan sawitur a awm lemlo, a rinhlehawmna lai lian lutuk hian ngaih a tithalo a, inchiahpiah lutuk hian  thil duhawmlo liantham a hringchhuak thei a, inchhir emaw, thilthalo lianzawk thlen belh emaw hi a hla vaklo maithei, fimkhur hunlai a ni a, hmala theituten hma an lak nasat zual hunlai a ni bawk ang.