Tukin leh vawiin lam ah Bangladesh Refugee 127 ten Lawngtlai District an lut.

Tukin zing dar 2 vel leh vawiin chawhnu lam khan Bangladesh, Chittagong Hill Tracts atangin an sahimna zawngin mi 127 ten, Lawngtlai District an lut.

Chittagong Hill Tracts a Kuki Chin National Army ten thuneihna sang zawk an ngiatna kalzel ah henglaia Zohnahthlak, Bawm hnam te chu  an sahimna zawngin Lawngtlai District ah engemawzat an lut tawh a, hun engemawchen raltlan lutthar hi thihtham an awmloh hnu ah tukin zinglam dar 2 vel khan Chhungkua 18,  an vaiin 124 ten Lawngtlai District an lut a, vawiin chawhnu lam khan chhungkaw khat luhbelh lehin tukin leh vawiin chawhnua Bangladesh raltlan Lawngtlai District a lutte hi an vaiin mi 127 an ni.

The Lawngtlai Post thulakna in a tarlandanin, Bangladesh raltlan lutthar zinga mi 21 ten  Khawmawi, Hruitezawl, Hmawngbu, Bungtlang South leh Vathuampui an pana, a bak zawng chu Chamdur 'P' a  an awmlailawktura ruahman Community Hall ah awmtir rih an ni.

Lawngtlai DC Office chuan raltlan luttharte hi a theih ang anga buaipuiin, Bungtlang South BDO Pu Samuel Lalmalsawma Sailo chuan a theih ang angin tulpawimawhte a bawhzui nghal bawk a, Sorkar lam chuan raltlante mamawh hmasa phuhruk nan Buhfai leh Silpaulin engemawzat a pe nghal a, khawtlang hruaitute nen raltlante enkawlzui dantur hi ruahmanna siamchhoh mek a ni.