Siaha Auto Rickshaw Driver thattute chu Raltlan an nilo ni an hriat thu Mizo Zirlai Pawl leh Network for Unity Association, Mizoram ten thuchhuah siamin an sawi a, Arakan Army nen inzawmna nei niin an hria.
MZP Gen Hqrs. Aizawl chuan thuchhuah siamin 24 January 2024 a Siaha ECM Vaih-a cheng Zawasa tual thihna pawi an tiin, Zawasa kalsan chhungkhat lainate MZP chuan a tawrhpui takzet tih an tarlang a
Rang taka pawi khawihtute zawng chhuaka, hmalatute chungah lawmthu sawiin,Pawi khawihnaa mawhphurhtute na taka hrem turin thuneitute an ngen bawk.
MZP chuan, he pawi khawihnaa inhnamhnawih te hi Rakhine (Arakan) lam mi, Zohnahthlâk raltlante nen inzawmna neilo niin a hria a. Arakan Army (AA) nena inkungkaihna nei nia hriat niin, Lawngtlai refugee camp-ah pawh an awm lova, Chakkhai lam tura zin veivak mai an nia hriat a ni bawk. Chuvangin, he thil thleng avang hian an taksa himna zawnga Mizoram a lo tlan, mipui, nunau pawi sawilo harsa tak takte hmer tel lo turin Mizoram mipuite a ngen tih an thuchhuah ah an tarlang
Mizo mipuiten, duat leh hmangaih taka kan unau raltlante kan enkawl mek laia, hetiang pawi khawihna lo thleng hi MZP chuan pawi a ti takzet a. Chutih laiin, Zofa pawh ni lo Rakhine (Arakan Army nia sawi bawk) te avanga kan unaute lakah kan thinrimna kan hrikthlak hi MZP chuan a hlau hle a. Kan unau raltlante pawh finkhur nana lo hmang turin kan ngen nghal a ni tiin an tarlang tel bawk.
Network for Unity Association, Mizoram pawn thuchhuah siamin Tualthattute hi Arakan Army (AA) nena inkungkaihna nei nia hriat an nih thu tarlangin, Lawngtlai Refugees Camp-a awm an ni lova, an Bike 125 KENBO chhia chu Refugees Camp-ah a part a awm avangin lei tuma lo lut an ni a, Myanmar raltlante thil tih anga thu thang awm hi pawi an tih thu tarlangin tualthattute an dem takzet tih an sawi
Network for Unity Association, Mizoram chuan Myanmar raltlante theih tawpa tanpui a, chhawmdawltu Zirlai pawl te, NGOs(YMA,YLA.MTP Etc.) Mizoram mipui zawng zawng chungah lawmthu an sawi a, heng misual te pawikhawihna avang hian tlanchhiat leh chuan natur nei tawh lo Refugees-te tan thil duhawm lo zawk a thlen loh nan Mizoram mipui te hriatthiamna leh khawngaihna an ngen bawk.
