Mizoram Journalist Kolasib District Annual Conference 2024 chu vawiin chhun dar 12 khan Mizoram House, Guwahati ah hman a ni a, he hun hi Dr.Malsawmtluanga Fanchun, DRC Guwahati Mizoram House in khuallian niin a hmanpui.
MJA Kolasib District Annual Conference hun khatna hi Pu Andrew VL.Auva President in kaihruaiin, Secretary leh Treasurer report ngaihthlak a nih hnuah rorel inkhawm neih zui nghal a ni.
Annual Conference hun hnihna Tv.R.Lalnunmawia Treasurer kaihhruaiah hian khuallian Dr.Malsawmtluanga Fanchun DRC, Guwahati Mizoram House chuan Journalist rual zinga hun a hmang thei leh khuallian atan a tang thei chu lawmawm a tih thu leh a hun tawna ropui pakhat a nih thu a sawi a. Guwahati chu North East a khaw pawimawh a nih piah lamah mizoram atang pawha damdawi in an rawn pan nasatna hmun a nih thu a sawi bawk. Journalist te chu hna pawimawh tak thawk, khawtlang leh mipui hawiher siam danglam thei a nih thu sawiin, social.media lamah thu dik leh diklo a leng nasa thin a, chutiang karah chuan thudik tak puang chhuaktute in nih avangin in dinhmun a pawimawh hle a ni a ti a. Chanchinbu mite chu thu dik leh thu tak ngei chhuah tura beisei an nih thu sawiin tunlaia social media avanga harsatna an tawh thin chu harsatnaa ngai mai lova chonaa ngai thin turin a chah bawk.
He hunah hian Pu Andrew VL.Auva President MJA Kolasib District pawhin thu sawiin, a term chhunga harsatna leh buaina awm lova member te inpawh tlang taka hun an hmang.thei chu lawmawm a tih thu sawiin, ram leh hnam tan ke pen zel turin member te a sawm a nj.
Annual Conference ah hian MJA Kolasib District kum 2024-2026 chhung hruaitu tur an thlang nghal.