Vawiin khan, Pu C. Rongura Executive member, LAD, LADC Office-ah Lawngtlai Tripper Owners/Driver Association, CYLA, Sanitation Department, Land and Revenue Settlement Department leh dan lova KMMTTP kawng hrula bawlhhlawh leh leivung paih tuartu VC thenkhat ten Joint meeting nei in, harsatna tawh hrang hrang, tawn mek leh hmachhawp te, hmalak dan tur te an sawiho.
Joint Meeting chuan, Leivung paihna mumal zawka neih anih thuai theih nana Joint meeting hmasain a lo rel tawh ang in, Leivung paihna hmun tur Land and revenue settlement Department lamin ram ruak an lo pek tawh chu, hman theih tura tihfel ngai te tihfel ni se, a paihna hmun lova paih lui te chu Sanitation Department lamin a tul angin hremna lek kawh se, LAD Department lamin a paihna hmun tur chungchangah mipui leh Driver te hnenah information lo pe se an ti.
Leivung paihna hmun pakhat chauh neih chu hun lo kal zelah induhkhawp lohna a la awm chhoh zel theih avangin NHIDCL lamin Spoil bank atana an hman mek ram then khat leh man chawia leivung paihna hmun mimal ram te pawh a hma lama biak ni se tih a ni bawk.
Meeting kaihruaitu, EM Pu C. Rongura chuan, Lawngtlai khawpui fai leh fai loh chungchangah mawhphurna sang tak neitute vek an nih ang in, tumah thawhhona tha tak nen khawpui leh a vel faina kawngah mahni zawn theuhah theih tawp chhuah turin kal khawmte hi a sawm.