Vawiin khan Pang Cultural Association , General Headquarters leh Arts & Culture Deptt, Govt of Mizoram bultumin Vathuampuah Joint Cultural Meet ropui takin hman niin, Pu Lalchuailova, Deputy Director, Art & Culture Deptt Govt of Mizoram chuan Khuallian niin hun a hmanpui a ni. He hun hi Pu R.Lalngilneia , Chairman Organising Committee chuan kaihruaiin , Rev.Lalnunpuia, PCI chuan hunserh a hmang a , Pu PK Zothana GS GHQ hnen atangin inhmelhriattir hun hmang hmang bawk a ni. Khuallian Pu Lalchuailova, Deputy Director chuan thusawiin , Pang Cultural Association leh Art & Culture Deptt. te tangkawpa Joint Cultural Meet kan hmang thei hi a lawmawm ka ti hle a ni. Mizoram ah hian hnam hrang hrang kan awm a, vawiina he hun hmang tura hnam hrang hrang kalkhawm, Pang , Bawm, Bru leh Chakma te kan kalkhawm thei hi a lawmawm tak zet a. Kan culture te humhim vawngnung ila, kan hnam ziarang te chawisangin i humhalh zel ang u. Pathian in hnam ah min din hi zahpui mai lo in, kan Kristianna leh culture hi kalkawp tur a ni a, ram leh hnam tan theitawp chhuah zel turin kalkhawmte a chah a ni. Khuallian chuan sawi chunzawmin, Pang, Bawm, Bru leh Chakma unaute'n harsatna inneihte Art&Culture Deptt ah min hrilhhria ula, intan theihtawp kan chhuah zel dawn a ni a ti bawk
Pu Pc Lalbiakkima , President PCA pawhin thusawiin , Vawiinah Joint Cultural meet kan hmang thei hi lawmawm ka ti hle a, he hun kan hman theih nan Art & Culture Gov't of Mizoram in kan ngenna te min tihhlawhtlin sak avangin an chungah lawmthu ka sawi a ni. Chutihrualin, Pangfate hi Mizoram hmun hrang hrangah kan khawsa a, abiktakin Pangfate awmna Vathuampui hi ram buai lai khan thisen luanna khua a nia, heti taka ngaihsak hlawhlo leh endawng kan ni hi nâ ka ti tak zet a ni. Mizoram Sawrkar a ka hotu lian te hian Pang hnam hi min ngaihsak leh zual ka phut tlat a ni a ti bawk a ni.