Editorial || TUIPUI FERRY AWMZENEIA ENKAWL KAN MAMAWH.

Social Media lam te sawi a awmfova, he Column ah pawh hian kan ziak nual tawh a, a ngaihven deuh tan chuan a thupui atang ringawt pawh hian kan sawitum a hriat nghalin a rinawm a, hmalakna mumal hriattur a awmlo chu titi chhunzawmna thatak a nih ngei a rinawm.

Chhimtuipui hian kan nunna a la hnem tawhin, mipuiin an pan nasatna lai erawh awmzeneia enkawl a ni silolai hi veitham a tling a, tui ngalrek chenlek tur a ngaihte hi tiau lakna vangin thuk tak tak a awm thluah niin an sawi a, henghi awmlomahse, luipui a ni a, chetsual theihna remchang a tam sa hrim hrim a, fimkhur taka chet hi helai pantu tamzawkten an tlakchham a ni fo thin a, fimkhur sen pawh a ni heklo.

Hlauhawmchin chhinchhiahnate, kalphallohna laite mumal taka siam a hun tawhin, vanduaithlak taka chesual palh an awm pawh a, chhanchhuah hna thawk nghal theitur  Guard thlengin mamawhna a lian takzet.

Thuneituten an ngaihthah vang hian vanduaina kan tawk leh thin ang tih pawh hlauhthawnawm a ni a, khulai Tuipui Ferry khu tawngpawng kalkhap ngawt erawh a fuhlovin a rinawm a, hawikhawthawnna remchang khawpuiin a neihchhun a ni hial maithei a, khuahkhirhna khauh tak hnuaiah him leh zalen taka tualchai theih tura ruahman hi thuneitute mawhphurhna a ni a, helam hawia hmalakna hriattur a awm vat pawh beisei ila, kan beisei ten hmalakna an neilo a nih chuan mipui mangang hian Central YLA an auh hun a thleng thuaiin a rinawm.