Vawiin khan BCM in Missionary pali tirhchhuahna hun an hmang.

     Vawiin khan Baptist Church of Mizoram, Biak In, Lawngtlai Bazar ah Missionary pali  tirhchhuahna hun hman a ni.

    Missionary tirhchhuahna hun hi Rev Lalremsiama Ralte Director, Mission chuan kaihruaiin,  Rev. Dr H.Lalthlamuana Executive Secretary, Lawngtlai Area chuan Missionary tirhchhuahna hun hi hmangin thilpek a hlan a, Rev Dr.R.Lalthanmawia Associate General Secretary, Mission  chuan Pathian thuchah sawiin, Lal Isua'n ramtina kala chanchintha hriltura mihringte a tih chu, hlenturin Lalpa tana mi inpe Kohhranin a nei thin chu lawmawm a tih thu a sawi.

    Vawiina Missionary tirhchhuah te hi Runtung khua ZD Malsawmtluangi, Evangelist Nurse, BMS Ngengpuitlanga thawktur, Lalrampanmawia Hnahthial, Evangelist Teacher, NCS Vathuampuia a thawktur, H.Hminghlupuii Mampui, Evangelist, Hong, Arunachal West Field a thawktur leh Lalfakawma Tlangte, Zotlang Evangelist, Arunachal East Field a thawk turte an ni a, Missionary te tan Rev.Lalzarliana Khiangte Lawngtlai Bazar Bialtu Pastor chuan tawngtaisakna hun a hmang a, Lawngtlai Area Baptist Choir, Lawngtlai East Bial Zaipawl leh Lawngtlai Bazar Kohhran Zaipawl ten Pathian fakna hla sa in, Missionary tirhchhuah pual hian inkhawm banah thingpuiruai an kilho nghal a ni.