Sorkar thuchhuahin a tarlandanin, he hunah hian LADC -a Executive Secretary Pu H. Lalruatkima chu Khuallian a ni a. Naupangte pawimawhzia sawiin, Sawrkarin naupangte humhalhna leh hamthatna atana ruahmanna hrang hrang a neihte a tar lang a. Zirlai kal khawmte fuihna thu sawiin, nu leh pa thu awih tur te, a tha zawng chauhva social media hmang tur te, ruihtheihthil leh mipat hmeichhiat hman khawlohna laka inthiar fihlim tur te, tum fel tak neia lehkha zir tur leh Pathian hriatna nunpui tur tein a fuih a ni.
Lawngtlai DCPU huaihawta Naupangte Ni hmanah hian Lawngtlai District Child Protection Officer Pi Mary Lalremruati chuan kal khawmte lawmna thu leh hun hman chhan tlangpui a sawi a. Lawngtlai District Information & Public Relations Officer Pu C. Lalhruaitluanga'n naupangte fuih phurna thu (motivational speech) sawiin, Lawngtlai DCPU Counsellor Pi N. Darchhingpuii chuan naupangte himna tur leh fimkhurna tur (child safety measures & precautions) a lem nen entirin a zirtir bawk.
Naupangte Ni hmannaah hian Lawngtlai khawpui chhunga sikul hrang hrang zirlaite leh zirtirtute an fuan khawm a. He hun hi naupang pual a nih angin naupangte’n hlim taka hun an hman theih nan leh an thiam thilte an pho lan theihna tur hun remchang atana ruahman a ni.
Naupangte Ni hi India ram Prime Minister hmasa ber leh naupangte ngai pawimawhtu Pandit Jawaharlal Nehru pian champha phakah hman thin a ni a. He ni pual hian zirna in leh hmun dangah te naupangte tan intihhlimna buatsaih thin a ni.