Nimin khan Pu K. Sang chhum lehkhabu ziah "LAIRAM" tih chu Central YLA President Pu HC Vanlalruatpuia'n Lawngtlai Press Club ah a tlangzarh.
Pu HC Vanlalruatpuia chuan, "Lehkhabu Lairam tih chu, lehkhabu tha leh hlu tak mai, Lairam leh hnam hmasawnna tur atan history ropui tak tur ani a ti a, thangthar, ril zawk, mi thil chîk mite'n kan history an hriat belhna tur atana lehkhabu tangkai tak anih a beisei thu a sawiin, Lairam tan bungthar pawimawh tak a ni a tibawk.
Lehkhabu ziaktu, Pu K. Sang chhum chuan a lehkhabu chu Lairam leh Laimiten hmalama ke kan pen chhoh zelna atana kan hriatna tibengvartu anih a duh thu a sawi a. Thangtharten thil kaltawh an hriatna tibengvartu mai piah lam a, Lairam ah dik taka rorelna kalpui anih theihna tur atana darthlalang lehkhabu chu buatsaih anih thu a sawi a; LADC in Golden Jubilee, kum 50-na hial a hmang ta chu alawmawm hle tih sawiin, kum 50 na kan hman mek hian dinhmun sang zawk leh duhawm zawkah LADC lama hotute hian min hlangkai se tih hi ka duh hle a ni, a ti.
Lairam tih lehkhabu tlangzarh inkhawm hi Pu Salai R. Lahnim-an a kaihruai a, he lehkhabu Lairam hi phek 321 a chhah niin, copies 700 chhut a ni a, a man hi Rs.250/- a ni.