He hun hi Lawngtlai District Information & Public Relations Officer Pu C. Lalhruaitluanga chuan kaihruaiin, kangmei chu chhiatna nasa tak thlen theitu a nih avangin a laka him nana inven dan leh fimkhur inzirtir chu a pawimawh reng thu sawiin, mipui hnena darh zau zawka zirtirna hlan chhawng theitu chanchinbu mite chu tha thlah lova mipui rawng an bawlna kawng khata hman chhunzawm zel turin a chah a ni.
MJA, Lawngtlai District President Pu Lalngheta Ralte pawhin thu sawiin, Lawngtlaia chanchinbuten a theih chin chinah kangmei laka fimkhur tura inzirtirna an tar lan thin thu leh District MJA-in tun hma atanga Lawngtlai Fire Station hmasawnna tura hma an lo lak thin tawh dan te a sawi a. Kangmei laka himna tur leh kangmei venna kawnga Lawngtlai District-in hma a sawn theih nan chanchinbu kal tlang leh District MJA ang pawha Department thawhpui an inhuam reng thu a sawi.
Fire & Emergency Services Department hnuaiah Lawngtlai Fire Station hi September ni 9, 1998-ah din a ni a. Tunah hian thawktu 10 (Station Officer 1, Leading Fireman 2, Fireman 3, Constable 2 leh Driver 2) an awm mek a, Fire truck pahnih, tui litre 2,800 dawng tanky nei an kawl a. Kang thelhna tur tui thunna tur hmun (fire hydrant) hi hmun khat, Lawngtlai Chandmary-ah an nei a, hmun hnih dangah siam belh tura hma lak mek a ni.
Kuminah Lawngtlai Fire Station hi kang thelh turin tum 7 an che chhuak tawh a. He'ng hi ram kang vek niin, nunna chan an awm lo.