.jpg)
Mizoram zimte ah hian, achhunga chengte atangin, mahni chenpuite, tawngkam mawilo leh inhnuaichhiahna ang chi hriattur a awmfova, a tuartulamte dawhtheihna vangin, boruak lianzawk a chhuaklo thin a, inpumkhatna kawng erawh a chawkhnawktu a nihna chin a awm thin ang.
Tunhnai maiah pawh Social Media lam ah ADC huamchhunga mite hmuhsitna leh deuhsawhna ni a ngaihtheih thu a darh leh a, khatiang a tawngchhuakduh kha Mizo a lo ni a nih pawn, Hnam awmzia manlo, mawlluat vanga midang pawisawi pawh hrehlo, mahni hnam leh chipuite phuarkhawm aia, thendarh pawisaklohna thinlung atanga chhuakte pawh a ni maithei e.
Keini hohi intaia, inngura, in kheng hlek hlek tham kan nilove, Zo hnahthlak zingah, a hnam ang emaw, a Area ang te pawn, hmasawnlo deuh bikte a awmtheih, a khua leh a District ang pawn hnufual bik a awm theih, hengte hi a chhunga chengte rilru hliam zawnga tawngkam neih hian a siamtha lova, rilru inhliamna mai mai, mite thinlunga sernung tuhtu mai mai a ni tih hriat a tha khawp mai.
ADC Area a chengte hmusit a, deuh thinte hian a chung hi luhchilhin hrechiangse, an hram dan hi an thlak hlawk in a rinawm. ADC huamchhungah hian, hnam leh chibil anga inngura, innekna hriattur a awmlo, LADC huamchhung ngat phei chu, chitin hnamtin awmkhawmna a ni a, hnufual tak tak thlenga an chenna a ni. Heng ang kuahkhawma, lungrualtaka an awmtheihna hi a hnam lianber Lai hnam hian rilru thalo pulovin, Pi leh Pu hun atanga hnampuizia an chawinun tlat vang a ni tih a chiang.
Hnam anga inhnuaichhiahna hi sim a tha a, hetiang tiduh te hi endawngngam a tul a, an thu a zirin thubuai hlabuaia lak chi a nih phei chuan ngawihsanloh te pawh a finthlak hun a la awm theiin a rinawm. Mimawl pawh tuman an chhanduhloh chuan fing emaw a inti mai thin a, innekna atangin thiltha a chhuak dawnlova, inphahhnuaia, thuhnuairawlhna atangin Mizoram a chengte inpumkhatna hi suihngheh in a awm deuh deuh ang.