MYC, Cement Mistiri Training neih mek ani.

     Mizoram Youth Commission -in thalai, phai lama hna thawka awm, COVID-19   vanga Mizorama lo haw ten eizawnna an neih theih nana thiam thil chi       hrang hrang zirtirna   a ruahman zinga pakhat, ni 45 awh tur cement     mistiri training chu vawiin khan  Lawngtlaia BDO BNRGSK Hall-ah tan a ni.

Training hawnna hun ah Khuallian, Lawngtlai Sub-Divisional Officer (Sadar) Pi TT Beikhaizi chuan Lawngtlai District leh Mizoram pum ang pawhin cement mistiri kan intodelh lo tih sawiin, state dang mite rawih ngai lo turin Mizoram mi leh sa ngei rawih tur kan intodelh a tul tih a sawi a. Cement mistiri hna chu eizawnna tling, hna hmuh loh awm thei lo a ni tiin, mahni eizawn nan mai ni lo, ram leh hnam chhan nan pawha pawimawh tel a ni tih hria a, thahnem ngaihna, taimakna, dawhtheihna leh teirei peihna nen thiamna tak tak paw chhuak tura zir turin training tura kal khawmte chu a fuih a ni.

Training hawnna hun hi Lawngtlai BDO Pu Lalthakima Chhangte chuan a kaihruai a. PWD Building Sub-Division Lawngtlaia SDO Er Samuel Lalnunpuia'n thu a sawi bawk.

Cement mistiri training tur hian mi 40 thlan chhuah an ni a. Pu MC Lalnunmawia, JE (IWMP), DRDA Lawngtlai leh Pu R. Malsawmdawngliana Khawlhring, JE (Design) & Programme Assistant, DRDA Lawngtlai te'n training hi an pe   a ni.