Nimin Sept 30, 2021 khan Chakma Autonomous District Council (CADC)-a MDC 10 te chuan Chief Executive Member Durjya Dhan Chakma laka Chawngte Police Station-a First Information Report (FIR) theh luhah a CEM nihna hmang khawlova puhna a awm thu CADC Chairman Mohan Chakma hnenah thlenin, ban (disqualify) a nih theih nana hma la turin an ngen.
Udalthana-I khuaa cheng, Vickey Chakma d/o Sumbo Muni Chakma chuan CEM ni lai Pu Durjya Dhan Chakma lakah hian nimin khan Chawngte Police Station-ah FIR a theh lut a. FIR copy leh finfiahna a theh luhte chu CADC-a political party President-te hnenah a pe tel theuh bawk a ni.
MDC-te'n Chairman hnena hekna an theh luh leh FIR copy atanga a lan danin, Vickey Chakma hian CEM Durjya Dhan Chakma chuan video call hmangin tum eng emaw zat amah biain, mipat hmeichhiatna hmanpuiah a thlem thin niin a puh a. Video call kal tlang hian, amah chu mipat hmeichhiatna hmanpui a duh theih nan mawilo tak takin a che thin tih a sawi.
Vickey Chakma hian video call kal tlanga CEM chetla lai chu a phone-ah a record tih sawiin, a copy pawh finfiahna atan FIR rual hian a theh lut nghal a. [The Lawngtlai Post] Durjya Dhan Chakma lakah hian Indian Penal Code (IPC) section 376C hnuaiah hremna lekkawh turin Chawngte Police Station-a Officer-in-Charge chu a ngen a ni.
CEM ni lai Durjya Dhan Chakma laka FIR theh luh a nih avang leh he FIR-a amah puhnate hi MDC tih atana mawi lo ni a an ngaih avangin MDC 10 te hian The Chakma Autonomous District Council (Constitution, Conduct of Business, etc.) Rules, 2002 rule 12 & rule 13 hmanga Durjya Dhan Chakma hi MDC nihna atanga ban [The Lawngtlai Post] a nih an phut a. CEM thutthleng zahawmna leh thianghlimna vawn nun zel a nih theih nana Durjya Dhan Chakma hi ban a nih theih nan, Mizoram Governor hnenah thlen chhawng turin Chairman hi an ngen a ni.
Chairman hnena Durjya Dhan Chakma hekna theh luttu MDC-te chu: Amit Kumar Chakma, Ajoy Kumar Chakma, H. Amaresh Chakma, Charan Singh Chakma, Lakkhan Chakma, Lakhi Dhan Chakma, Kusum Lota Chakma, Onish Moy Chakma, Buddha Lila Chakma leh Shanti Jivan Chakma te an ni.
Hetihlai hian Chawngte Police te chuan FIR lut hi a tul angin an bawhzui mek tih an sawi.
Tags
News