Udalthana-I-a cheng, Vickey Chakma-in ka laka FIR a theh luh hi thu dik lo leh inphiar rukna a ni - Durjya Dhan Chakma, CEM, CADC chuan a ti
Chakma Autonomous District Council (CADC)-a Chief Executive Member (CEM) ni lai, Durjya Dhan Chakma chuan mipat hmeichhiatna kawnga amah chhaih buai thina puh a, a laka FIR theh luttu, Udalthana-I-a cheng, Vickey Chakma-in a puhna chu thu dik lo a ni tiin, inphiar rukna a nih thu a sawi
Durjya Dhan Chakma hian mipat hmeichhiatna kawnga mawi lo taka chea an puhna chu social media-ah te a darh avangin, mipui ai awha thlan a nihnaah mipui hnena insawi fiah baa a inhriat thu sawiin, insawi fiahna thu a chhuah a. He a thuchhuahah hian Vickey Chakma-in a puhna chu thu dik lo leh intihhmingchhiat tuma inpuhna a nih thu tar langin, hemi chungchangah hian October ni 1, 2021 khan Chawngte Police Station-ah dawta amah puh a, tihmingchhetu chhui chianga dan anga hma la turin FIR khin letna m a theh luh ve nghal thu a tar lang.
Durjya Dhan Chakma hian a laka FIR theh luttu nen hian inhmuh emaw, inbiak emaw an la neih ngai loh thu sawiin, Indian Penal Code, 1860 section 376C beh chhana hmanga thuneituin a hnuaia mi mipat hmeichhiatna lam hawia a thlema hrem theihna dan chu a lakah che lek theihna a awm loh thu a sawi a. IPC section 376C chu jail leh remand home ang chi-a Superintendent-te'n an enkawlna hnuaia awm hmeichhiate mipat hmeichhiatna lam hawia an thlem a niha hrem theihna dan a nih avangin mipui ai awha thlan, CADC-a CEM laka hman tum tlat chu thil awmang lo tak a nih thu a sawi.
FIR theh luttuin political party hrang hrang hnena FIR copy a pe leh MDC thenkhatin chumi ni veka CADC Chairman hnena MDC atanga amah ban tura hekna an theh lut nghal chuan a laka FIR theh luttu leh amah hektu MDC-te'n inthurualin a politic career tihchhiat tumin an bei tih a kawk tih sawiin, chhui chiang a, thil tisualtute laka dan anga hremna lekkawh ngei turin thuneitute a phut tih a sawi.
Durjya Dhan Chakma chuan he thilah hian mipuite chu tul lova thu vawrh darh lo tur leh dan anga hma latute ngaichang thiam tura ngenin, dan leh dikna chu dingchang ber se a duh thu a sawi a ni.
