Karkalta mai ah LADC a MNF legislature Party chu MNF Party atangin rintawklohna Motion putluh niin, paihthlak a ni a, Sorkar thar a CEM tur thlanna chu House ah neih a ni a, House Leader tur thlanna dan Council in a neih kha a Democracy viau in a hriat tih ngaihtuahzui duhte chuan an hrethei ang.
House ah khan CEM tur thlanna kha neih a ngai ta si a, Nomination thehluttu pakhat leh amah thlawptute kha House ah khan awm tasela chuan, Leader tur thlanna ah Member of District Council te chuan Vote an neithei vek dawn a, kha tak kha a Democracy in, he dan hi a ropuiin, Legislature Party Leader tur thlanna ah Opposition Member te pawn Vote an thlak thei lai tak hi a hlutna manthiam phakloh a ni hial maithei a, District Council dangte hian hetiang dan hi an neih ve leh neihve loh lam aiin, Member zawng zawng ten House Leader tur an thlantheihna kawng in hawng lai tak kha a ropui lai tak niin a hriat ani.
Hetia a landan chuan, Legislature Party chuan an Leader tur an thlangfel maitur a ngaih niin, chu chu mipui lam pawhin an hriatlangsar a ni a, kaldan pangngai ah chuan hetiang hi hman a lo nifo tawh thin a, tuntum ah khan House Leader thlandan kha a dangdai ta deuh nge ni a, khatiang dan awmreng si kha hman a tul thinloh vangin hmelhriat a hlawh lutuklo deuh zawk tih hriatthiam a har a, engpawhnise, Democracy ram ah mipui rorelna chu a lalber a, mipuiin an awiawh a an thlanchhuahten, dikna chanvo an neih inang thap a, Party bik pawh sawilova, rualkhai taka House Leader tur an thlan theihna dan LADC in a nei hi LADC ropui zia lanna a ni ngei ang.