Hripui vangin kumkhat chhung chu nunphung a mumallova, khawvel a buai a, India a buai a, Mizoram leh Lawngtlai ngei pawh kan buaidan kha tutemah inhrilh nawn ngai kan awm awmlove.
Hrileng in rehlam a pan chho a alan vangin Sorkar in kaihhruaina a siampawh thlahdul chhoh hret hret a ni a, hetichung hian, hrilaka invenna erawh ngaipawimawh tur atih kan nireng a, inkhuahkhirhna thlahdul hian hri hi a hlauhawm talo e, tihlam aiin, hrilakah inveng chungin, awmzeneiin nunphung kalpui a tul si a, mipuiten an zawh tawk leh ramin a tawrh loh theihdan tur a inthlahdulna a ni mah zawk a, helai takhi mipui lamin an manfuh a ngai in a hriat a ni.
Inkhawm remtih a ni a, a tirlam ah fimkhur theihtawpin Biak In leh a chhehvel ah hmalak a ni a, Pathianni vawihnih, vawithum inkhawm a nihhnu ah, hmai pawh tuamtha manglova khuang nen a zai ta maite pawh hriattur an awm chho a, hetihlai hian Sorkar laipui chuan fimkhur deuh deuh a ngaihthu an sawi thung a.
Thenawm khawveng inlenpawh leh puipunna lam leh tuallai nun hrim hrim ah, hri laka invenna kalpui chu ngaiah neih aiin kan thlauhthla hret hret in a hriat a, hri hian minla kiansan siloh vangin, kan inthlahdah hma lutuk deuh em aw, a tih theih a, nghawng duhawmlo zawk hi kan chungah a thleng thei a ni tih pawm ila, hripui vanga harsatna kan tawrh tawh te kha tuar nawn tawhlo turin, mitin ten nasa zawkin fimkhurna lam i uar teh ang u.