Nimin khan Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Lawngtlai DC, Dr Andrew H. Vanlaldika hovin DC Conference Hall-ah an thu khawm.
Lawngtlai DC chuan Lawngtlai District hma sawn nan bank leh line department te thawh hona tha neih a pawimawh thu sawiin, bank lam chu an sum dawn leh pek chhuah danah District mipuite tana rawngbawlna rilru pu-a thawk turin a chah a. District chhunga kut hna thawktute leh sumdawnna lama tui mite'n awlsam zawka bul tanna tur sum an puk theih nan bank leh line department te'n nasa zawka tan lakpui a pawimawh a ni, a ti.
He thut khawmah hian pawisa thir, a bikin Rs 10 thir hman a harsat chungchang leh dawrkaite'n an dawn duh loh thin chungchanga harsatna awm sut kian dan tur sawi ho a ni a. Rs 10 thir chu sawrkarin hman theih tura a siam chhuah a nih avangin dawn leh hman a hlauhawm loh thu tar lan niin, bank lamin pawisa thir an dawng duh lo thin nia sawi chu thil hriat chian loh vang a ni a, tum khata dawn theih zat bithiah awmin an dawn reng thu bank lam hotute chuan an sawi.
He thut khawmah hian mi harsa zawkte leh kut hna thawktute hnena a tam thei ang ber sum puktir (loan pek) a, chumi hmanga an dinhmun chawi kan chu DCC-in a tum ber a nih thu tar lan niin, Agriculture kaihhnawih loan pek chhuah a tam zawk theih nan line department leh bank lam te'n tan la chho zel se, tih a ni a. PMAY pek dan leh Self Help Group te hnena sum pek chhuah chungchangah bank lam chuan an ti tha thawkhat hle tih tar lan a ni bawk.
He hunah hian National Bank for Agriculture and Rural Development Mizoram Regional Office, Aizawl-in a buatsaih Lawngtlai District chhunga kum 2021-22 chhunga agriculture kaihhnawih leh bank behchhana hma lak theihna tur ruahmanna, 'Potential Linked Credit Plan 2021-22' chu Chairman/Lawngtlai Bawrhsap chuan a tlangzarh nghal a ni.
He thut khawmah hian Lead District Manager (Siaha & Lawngtlai) Pu Lallawmkima leh NABARD Lungleia District Development Manager Pu Evan T. Munsong bakah, RBI, bank hrang hrang leh line department ai awhte an tel.