Nimin khan Lawngtlai District Task Force Immunisation (DTFI) chu an Chairman, DC, Dr Andrew H. Vanlaldika hovin an thu khawm a. Lawngtlai District-a hriselna lama thawktu -te hnena COVID-19 hri danna thawh khatna pek tawh dan leh a frontline worker-te hnena pek dan tur ruahmanna leh hri danna dang kaihhnawiha hma lakna chungchang te an sawi ho.
COVID-19 hri danna chu January ni 19, 2021 (Thawhlehni) khan Lawngtlai District-a healthcare worker-te hnenah pek tan niin, a thawh khatna (1st dose) hi mi 700-in an la a. February ni 17, 2021 (Nilaini) atangin healthcare worker-te hnenah 2nd dose leh frontline worker-te hnenah 1st dose pek chhuah ve leh a ni ang.
Meeting ah hian special immunisation activity pawh tluang taka kalpui mek a nih thu ngaihthlak a ni a. Hei bakah hian, February ni 2, 2021 atanga National Immunisation Day kalpuiah Lawngtlai District chhunga nausen piang hlim atanga naupang kum 5 chin hnenah zenghri danna pek a nih thu ngaihthlak a ni bawk a. Lawngtlai District chhunga he hri danna la thei naupang 16,106 atangin naupang 15,924-in an la a, chu chu 98.9% a ni.