Lawngtlai District chhunga ramsain an buh leh bal leh thlai a tihchhiatsak chhungkaw 25 hnenah Environment, Forests & Climate Change Department chuan kumin January thla hian zangnadawmna pawisa a pe chhuak.
Kum 2020 July leh August thla khan Mampui ram leh a chhehvelah sai rual eng emaw zat chhuakin, lo neitute buh leh bal leh huan thlai a tihchhiatsak tih hriat a ni a. Sawrkar dan angin zangnadawmna pawisa dilna chu lo neitute hian theh lutin, Chhimtuipui Wildlife Division, EF&CC chuan a hmunah endikin, Zangnadawmna pawisa hi Environment, Forests & Climate Change Department chuan January, 2021 chhung hian pek chhuah theihin a ruahman fel ta a ni.
Tun tuma Lawngtlai District chhunga ramsain an thlai a tihchhiatsak avanga zangnadawmna dawngtu chhungkaw 25 zinga chhungkaw 10 chu Mampui khaw mi niin, a bak chhungkaw 15 chu Kawrthindeng, Mualbu, Tuithumhnar, Diltlang S, Khawmawi, Thingkah leh Lawngtlai-lll-a chengte an ni a. Tun tuma zangnadawmna pawisa pek chhuah zawng zawng hi Rs 58,600/- a ni.
Sawrkar chuan ramsain mihring nunna emaw, thlai emaw a tihchhiatsak chungchangah, mihring nunna hloh -ah chuan Rs 2,00,000/- thleng pek theih a ni a. Thlai tihchhiatsak ah chuan ram zau zawng atanga chhutin, hectare khatah Rs 5,000/- thleng pek theih a ni thung a ni.