December 31, 2020 a ni a. Ka sana chek ri chuan min tiharh zawk mai a, ka sana kan en nghala chawhnu her dar 2:00 a lo ri ta reng mai a. January ni 1 aṭanga December 31 inkara ka hun tawn leh hun hman dan te ka chhut neuh neuh a, lunglên na namenloin min rawn ṭham a, ka zawi hle mai a, ka diary ka chhiar leh rihthul a, mathei lovin ka lung a leng êm êm mai a.
Ka leklam fo, ka phone hlai chi ka phawra amah Lalsangzuali Sailo (Pi Zualbawihi'n)-a thiam leh nung tak maia a sak ngei hla chu ka hmetchhuak a, tihian ka sakpui al al a, ka hlim em em a, tihian a chang khatna-ah kan hmu a:
"Hun kal ta zawng zamualpui an liam zova, Nunhlui an chang ta dawn chang hian; Thinlai muhnu thove, zânmu chhin a har ngei e, Kumhlui aw kumhlui kan ti vawng vawng..."
Ka maimitchhing diar diar a, ka mit sulh a, 'Hun kal ta zawng zamualpui an liam zo va, Nunhlui an chang ta dawn chang hian...' tia a han phuah chhuah dan te ka mitthla a, a phuahtu leh satu Pi Lalsangzuali Sailo (L) hi kan zingah a nung damin awm tawhlo mah se, a va ril em, ka ngai sang thar hle a. 'Thinlai muhnu thove, zanmu chhin a har ngei e, Kumhlui aw kumhlui kan ti vawng vawng...' mittui hi biangah a far lo thei lo, min dekin min khawih ru riau bik a ni.
A thunawnah tihian kan hmu a (kan hria a ni mah zawk lah tak a..):
"Khawiah ṭuan che maw? Kumhlui aw dam takin liam mai rawh, Kan ngai em a ni, hlimni zawngte kha, Kir rello, i liampui ta maw?"
Ni e, a liampui chiang a ni. A chang hian chuan hriat thiam harsa tih leh kan rin kan Pathian nung engkimtitheia hi ka dem letling zawk zaw mah a, mahse, engkim hi Lalpa remruatna dan a ni a, vui thei kan ni si lo; ka farnu te pahnih ka û Lalhlimpuii Hauheng, kum 47 mi ni a April 27,2020 a cancer natna avanga boralta leh Esther V. Sanglianpari (Partei) kum 38 mi, March 11,2020-a vân kohna chhanga muthilhna thuruk ril ber changa chatuan atana an mit khawvêl ata chhing hlen ta te pahnih ka hre chhuak a, ka mit sulh a, an ngaihawm mang e aw ka ti vawng vawng a, biangah patling hi mittui a hnãm leh ṭhin. Ka ngai em a ni, hlimni zawng te kha, kir rello, i'n liampui ta si a maw?!
Chhug kimtea kan lenlai te, tun ang hun tlaia ka pa ina chhung inkhawm a hruai lai hun te kha ka hre chhuak fo a, chhungkaw kima dam tlan hlut zia te, inhmangaih leh inngaih dial dial a, hetiang hun hman leh tikni hi awm leh thei tawh tak ang i maw; mahse kan kim tawh si lo. Aw, ṭah ruai ruai hi ka lo nuam a sin, sen nauang nuih ni zawng te kha. Kei chu hetiang hunah hian ka no leh thin. A chang hnihna hian min vel ṭap leh a:
"Panlai hun leh kimtea kan lenlai nite,
Ngaihlai lungduhte nen lungrual a,
Engdang reng dawn lova sen nauang nuih ni zawng kha,
Auhruai ka nuam i liampui ta si a."
Vaivuta siam kan nih chhung hian zawng, he khawvel ram zauah hian, nunhlui ngailo reng an awm dawn si lo va, chung zinga dama ka tel ve phak te hi ka lawmin nihlawh kan in ti tak zet. Dam ni leh kum a liam a, vul lai pâr a la chuai hunah erawh zawng—Kumhlui ngaih lunglên te hi kan bang ve tawh mahna le.
"Vanhnuai, ram zau khawvêla kan len chhung hi zawngin,
Kumhlui ngailo reng an awm lo, Damlai pâr ang chuai a, chatuan ram thlen hunah zawng,
Kumhlui ngaih lunglên a awm tawh lo'ng."
Kan lungngaih mittui tlaknate — kan pi, kan pu, kan nu, kan pa, kan ú leh naute kan sûnna mittui tal hian, kumhlui ngaih lunglên a awm leh tawh ngai lohna ram, Vanram nuam khi min ngaihzual tir thar se la; chumi mitthla chungin kumhlui ngaih lunglên hi i ṭahpui ang u. A hlu, a hlu zual dawn a ni.
Kei chu, "Chatuan ram thlen hunah zawng, kumhlui ngaih lunglên a awm tawh lo'ng" chu ram chu ka ngai zual ṭhin.
Thinlai muhnu a thove, zanmu chhin a har zual ṭhin, tih hrereng chungin -
'Kumhlui a liam, kumthar êng, A lo chhuak leh kan vannei em!'
LH.Hauhêng, Nghilhloh Rûn
December 31, 2020 3:25pm