Lawngtlai East bialtu MLA, Agriculture Development Board Vice Chairman ni bawk Pu H. Biakzaua chuan Inrinni khan Lawngtlai College Venga Lawngtlai Residential Sports School sakna tur atana vauchher hmunhma tlawhin, hma lak dan tur a enfiah.
Pu H. Biakzaua chuan Lawngtlaia residential sports school a awm thei tur chu Lawngtlai District tan hmasawnna ropui tak a ni dawn tih sawiin, infiamna kawnga District thalaite kawng sialsaktu tur a nih a beisei thu a sawi a. School sakna tur hmun petu College Veng Branch YLA te chungah lawm thu sawiin, District hmasawnna atana an inpekna a fak a ni.
Lawngtlai East, MLA Pu H.Biakzaua hi Lawngtlai College Veng Branch YLA hruaitute'n lo dawngsawngin, school sakna tur hmun hi an lo enpui a. School hi College Veng YLA khelmual awm sa beh chhana sak tura ruahman a ni.
Lawngtlai Residential Sports School hi Pradhan Mantri Jan Vikas Karyakram (PMJVK) hnuai atanga sak tur niin, a sak nan Rs nuai 3461.70 ruahman a ni a. District Council & Minority Affairs chu nodal department niin, Sports & Youth Services Department chu implementing department a ni thung a. Sum pawh sanction tawh niin, hna pawh tan theih thuai a nih beisei a ni.
Tags
News