Democracy ram ah Political Party zawm te, mahni awmna atanga Party dang zawm te hi thilmak a nilova, thillangchiang erawh chu, Politician rintlak leh ram tana thawhhlawk tak tak te hi mahni awmna Party sawn kual fo an tam lo maithei.
Political Party te chuan ram tana thiltihtum an nei theuh a, chu chu mipui an huikhawmna hmanrua a ni, an thiltum tha titute chu Party pakhat ah an awmkhawm mai thin a, heihi thilnihphung pangngai a ni.
State a ni emaw, Council a ni emaw, inthlanpui hmachhawn a nih dawnin, mipui hneh nan lawmlut boruak chu chhemalh a ni fo a, a tangkai leh tangkailoh chu thudang ah dah ila, patling a pumpa, mahni a ngaihdan mumaltak nei, Vote neithei chinin, mahni awmna Party an sawnfo hi chuan, Politics laimu an manpha chiahlo a ni mai awmmange, a tihtheih laiin, an awmna Party ah rinna an nghah ngam miau loh chuan tutemah demtheih erawh an ni lawisilo.
Politcal Party hi engvanga zawmnge an nih tih hian, ram hnuk a thlunzawm tlat a, ram hmasawnna beisei vanga zawmnge an nih a, anmahni pumpuarna tur beisei vang tih te, tute emaw boruak tihlensak tumna vang mai mai tih te leh a chhan dang tamtak a awmthei ang.
Party tuinu hian chiahpil a ngahna hmun ah ram hmasawnna a kalchak thei lova, Party tuifimin mipui a chiahna apiang ah hmasawnna a kalchak thin a, Inthlanpui ah enge mipuite an zawrh dawn tih pawh hriat hma a, Political Party a inlawmluh thawm hriattur a awm chho tan hi, a that viau laiin, mipui nawlpui tan chuan ngaihdan siamna hun erawh a la nilovin a hriat a ni.