DC leh PPA te an inkawm

 Nimin  khan Lawngtlai DC, Dr. Andrew Vanlaldika chuan Phawngpui Photographers Association (PPA) hruaitute a Office-a lengah sawmin an inkawm a. PPA hmasawnna tur hrang hrang leh Lawngtlai District chhunga PPA anga hmalakna tur hrang hrang a sawipui. 

       DC hian Lawngtlai District-a khualzin mite hip thei tur hmun mawi kan neihte leh District chhunga thil tha awmte pho chhuak a, District leh State pawn a?ang thlenga khualzinte hip thei tura District chawikanna kawngah Photographers Association te mawhphurhna an neih thu leh, kan ram chhunga nungcha leh ramngaw te bakah Culture leh tradition vawn nun leh chawisanna kawnga Photographers te mawhphurhna neih thuk zia te a sawipui bakah PPA hmalakna hrang hrangah a tih theih a awm nih chuan inthlahrung lova thlen zel turin PPA hruaitute hi a lo chah bawk. 

        PPA hruaitute chuan an hmalakna tui pui tu leh anmahni ngaihsaktu Deputy Commissioner an neih avanga vannei an in tih thu sawiin DC hova Photographer te hmasawnna tur lam hawi programme tha tak la neih ngei an inbeisei bawk a ni. PPA hruaitute hian Photographers Association anga District hmasawnna atana thawh ve theih an nei a nih chuan tlanchhe lova tihhlawhtlin zel an tum thu DC hnenah hian sawiin PPA hmingin thlalak frame sa an hlan ve bawk.