DC kut ah Covid-19 dona a hmantur tanpuina hlan

     Nimin khan DRDA Lawngtlai, Lawngtlai Sub-Headquarters MHIP leh Chakma Autonomous District Council  te chuan COVID-19 dona kawnga Lawngtlai District Level Task Force tha tihchak nan tanpuina pawisa fai an hlan.

         Lawngtlai DRDA hnuaia thawk te'n sum an thawh tling khawm Rs 50,000/- chu nimin khan Lawngtlai DRDA Project Director Pi Marilyn Rualzakhumthangi chuan Lawngtlai DLTF Chairman, DC, Dr Andrew H. Vanlaldika kutah hlanin, COVID-19 dona kawnga DLTF-in sum a mamawhna sang tak tlem azawng tala an phuhruk ve theih beiseia DRDA staff-te chuan tanpuina hlan an nih thu a sawi.

       MHIP  Sub-Hqrs   Lawngtlai hruaitute pawhin nimin vek khan Lawngtlai DC chu a pisaah kawmin, COVID-19 hri leng dona kawngah a tul anga DLTF thawhpui zel an tum thu an hrilh a. July ni 6-a lawm thin MHIP Day puala DLTF an tanpuina pawisa fai Rs 5,000/- (sang nga) chu Sub-Headquarters MHIP Vice President Pi Vanlalhlupuii Fanai chuan DLTF Chairman kutah hian a hlan a ni.

     Nimin vek khan Chakma Autonomous District Council (CADC)-in COVID-19 dona atana Lawngtlai DLTF a tanpuina pawisa Rs 1,50,000/-  cheque chu DLTF Chairman chuan a dawng bawk.

   
         
Nimina  Lawngtlai DLTF kuta tanpuina sum lut hi a vaiin Rs 2,05,000/-  a ni a.