Ram tana a nunna hlantu, Carolyn Lalvenmawii, ropui taka vuiliam a ni

        Fungsihchhuah, Chhimtuipui ramria hrileng venga duty laia dam lo nunna chan ta Carolyn Lalvenmawii kum 18, Pu H. Kapliana, Sangau-I fanu chu a ral nan Chief Minister Relief Fund atangin Cheng Nuai 1 pek a ni dawn tih sorkarin a puang.

         Sangau PHC-a niminpiaha thi Carolyn Lalvenmawii hi nimin chawhnu dar khat khan Sangau-ah vuiliam a ni.

        Carolyn Lalvenmawii hi Myanmar ramri Fungsih chhuah-ah May ni 4 atanga ni 11 chhung khan Covid-19 hrileng vengin a duty a. Heta tang hian dam lo tanin, engemaw chen Sangau PHC-ah enkawl a ni a. Damdawi in atanga a chhuah hnu-ah that lam pan hleithei lovin Thawhtanni liam ta khan Sangau PHC-ah dah luh leh a ni a, nimin khan a boral zui ta a ni.

            Carolyn Lalvenmawii hi nimin khan Sangau-I thlanmualah vuiliam a ni a; Branch YLA hrang hrang te chuan vuina inkhawm neih rual hian khaw tinah sunna hun hmangin, chawhnu dar 1 atangin minute 5 chhung sunna hman a ni a, Central YLA President Pu J.Sangthangpui hovin Lawngtlai Areopagy-ah sunna hi hman a               ni bawk a, Branch    YLA tin ten YLA In    leh hmun remchang laiah YLA Flag a      ngul chanvein an zar bawk.

            Nimina Lawngtlai DC hova District Level Task Force thutkhawmah pawh sunna hun hi hman a ni.

           

              Ram hruaitu leh Central YLA bakah Branch YLA hrang hrang ten  Lalvenmawii an ui thu an sawi a. LADC CEM Pu T. Zakunga, Lawngtlai East Bialtu MLA Pu H. Biakzauva Lawngtlai West Bialtu MLA Pu C. Ngunlianchunga bakah Mizoram State a  Congress Legislature Party (CLP) ten ralna sum an hlan a ni.