Vawiin atanga inkharkhip thawh 5-na hman tan turah Mizoramah chuan lirthei in mi a phurh theih pangngai a phurh phal a ni a, biakin a inkhawm khap chhunzawm a ni thung.
Chief Secretary Pu Lalnunmawia Chuaungo, chuan June ni 30 thlenga inkharkhip kaihhruaina nimin khan a tichhuak a. Lirthei reng rengah chuang thei chin zat aia tam chuan khap a ni a. Aizawl khawpui a lirthei nambar kawpkim leh kawpkim lova an intlanchhawk laiin Mizoram chhung khaw kar kawnga mihring phur lirthei leh town/ city bus, taxi, auto rickshaw leh two-wheeler taxi te chu tlan phalsak an ni ang a. Lirthei khalhtute leh an phurh te'n hmui tuamna an vuah vek tur a ni. Passenger-te hman tur hand sanitizer an pai reng tur a ni. Sorkar laipuiin June ni 8 atanga sakhaw biakna in hawn a remtih laiin Mizoramah chuan inkhawm khap chhunzawm a ni a, kohhran pisate erawh hawn phal a ni.
Zan curfew chhunzawm a ni ang a. Mizoramah chuan zan dar 7 leh a chanve atanga zing dar 4 leh a chanve thleng pawn chhuah khap a ni a, Mi panga aia tam pun khawm khap chhunzawm a ni. Mipui punkhawmna chi inneih lawmna, lungphun, anniversary leh piancham lawmna, games & sports tournament, lehkhabu tlangzarh, politics leh pawl thila kalkhawmna, intihhlimna ang chi reng reng he hun chhung hian huaihawt phal a ni lo. Inneih inkhawm leh mitthi vuina-ah mi 20 aia tam punkhawm khap a ni bawk.
Ramdang leh thenawm state nena ramrite chu khar chhunzawm a ni ang a, Mipui zin veivahna lirthei erawh chu Home Department phalna neite tan lo chuan khap tlat a ni a. Ramri leh ramri dep khuaah te khauh taka duty chhunzawm zel a ni ang.
Dawr leh sumdawnna hmunte hawn phal a ni a, hmun lunlai/dawrkawna dawr leh building khata dawr inthenawmte chu nikhat kar danah an inhawn chhawk ang. A ni zawnin dawr pakhat inhawn phal a ni lo. Dawr inthenawmte nikhatah a rualin inhawn phal a ni lo. Hei hian zirlaibu zawrhna dawr, essential commodities leh eichawp zuar dawr, mihring leh ran damdawi dawr leh clinic-te a huam lovang.
Tags
News