Lawngtlai District-ah khung hran mek mi 406 an awm

Lawngtlai District mi leh sa state pawn atanga lo haw, government quarantine facility, community quarantine facility leh home quarantine-a khung hran mek zat chu nimin  tlai dar 5:00 thleng khan mi 406 a ni a. An zinga pariat, COVID-19 positive-te chu Lawngtlai Covid Care Centre-ah dah hran niin, an hriselna dinhmun vil reng a ni a, ngaihtuahawm an awm rih lo.

Nimin khan Tripura atangin mi 4 lo thlen belhin, Tourist Lodge Lawngtlaiah dah an ni a. ANM School Lawngtlai atangin mi 17, Medical Quarters atangin mi 6, Tourist Lodge Lawngtlai atangin mi 4 leh Circuit House Lawngtlai atangin mi 1, an zavaiin mi 28 chu an khung hran hun bi a kim tawh avang leh RT-PCR test-a negative result an neih avangin chhuahtir an ni.

Zoram Medical College (ZMC)-a RT-PCR test tura swab sample thawn tawh zawng zawng 784 atangin result hriat tawh 692 a awm a, he'ng zinga pariat chu positive case niin, result nghah lai 92 a la awm.