LADC Sorkar chuan Covid 19 do nan DC leh Dist. Hospital ah tanpuina pawisa an hlan

           

           Lai Autonomous District Council (LADC) sawrkar chuan nimin khan COVID-19 hri leng dona kawnga a tul anga hman atan Lawngtlai DC kutah Rs. 3,00,000/- leh District Hospital Lawngtlai District Medical Superintendent kutah Rs. 2,00,000/-  an hlan.

          LADC-a CEM Pu T. Zakunga leh Executive Member-te leh LADC official-te chuan Lawngtlai DC thar Dr Andrew H. Vanlaldika chu a office-ah kal chilhin, tanpuina sum hi an hlan a. LADC Executive Secretary Pu H. Lalramenga chuan DC thar hi Lai hnam puan hlanin, LADC chuan thinlung takin an lo lawm tih a hrilh bawk.

         DC chuan LADC-in hripui do nana anmahni zawna an thawh mek piah lamah, quarantine facility enkawlna leh tul danga tangkai taka hman theih tur tanpuina sum fai District Administration kuta an hlan leh zel chu lawmawm a tih thu a sawi a. District Administration leh District Council inkarah thawh hona tha a awm phawt chuan hri dona chauh ni lovin, hmasawnna kawng hrang hrangah Lawngtlai District chuan hmel thar a hmuh a beisei tih sawiin, Council leh DC lam te awmze nei zawka hma lak ho dan tur zawn tul a tih thu a sawi.

          CEM chuan ramin hun harsa a hmachhawn mek a, tun hi tan rual hun a ni tiin, LADC sawrkar chuan  theih tawp chhuaha hma a lak thu leh Budget Session neih mai theih a nih loh avanga tuna tanpuina an hlan pawh chu tlema khawtlai hret a nih thu a sawi a. DC thar kaihhruaina hnuaiah District Administration leh Council inkarah thawh hona tha a awm zel a beisei thu a sawi.

           LADC-a CEM leh Executive Member-te leh official-te hian Lawngtlai District Hospital pawh tlawh nghalin, COVID-19 do nana a tul anga hman atan Rs. 2,00,000/- an hlan bawk. 

             LADC hian CEM Relief Fund for COVID-19 atanga buhfai quintal 1000 an lei chu an sem chhuak mek a. Hei bakah hian, CEM Relief Fund atang hian ramria duty-te leh hri dona kawnga hma latu hrang hrang hnenah pawisa faiin an lo sem chhuak tawh bawk a. Nimina DC leh District Hospital-a tanpuina sum an hlan chu CEM Relief Fund atanga hlan ni lovin, LADC Sorkar sum a nih thu sawilan a ni.

          Nimin vek khan Sihtlangpui VC ten Covid 19 do nan  Lawngtlai DC hnen ah Rs. 10000/-  an chhunglut, Thilpek hlantute chung ah DC chuan lawmthu a sawi.