State I&PRO ruahmanna in MJA ten KMMTTP leh Lungmak an tlawh

          Information & Public Relations Department huaihawta SEDP hnuaia Press Project Site Visit buatsaihah Lawngtlai District MJA-te chuan niminpiah khan India leh Myanmar insumdawn tawnna tur KMMTTP kawngpui laih mek leh Lawngtlai District chhunga Hruitezawl khaw bul Chhimtuipui luia 'lung mak' an tlawh.

            He press project site visit-a kal turte hi Lawngtlaia prominent journalist, Lairam chanchinbu Editor Pu V. Lallianzuala chuan Lawngtlai Press Club atangin a vai liam a. He project visit-ah hian Lawngtlai DIPRO Pu C. Lalhruaitluanga,  kaihhruaiin Lawngtlai District MJA te hi an President Pu Lalngheta Ralte hovin an kal a ni.

             KMMTTP kawngpui laih mek an ennaah hian PWD Multi Modal Project Division Engineer-te leh kawng laih hna thawktu contractor-te'n he team hi lo dawngsawngin, an hriat duh angte an lo hrilhfiah a. Lung mak an ennaah hian Hruitezawl khawtlang hruaitute leh tlawmngai pawl hruaitute'n an khuaah lo dawngsawngin, a hmunah an zui ve bawk.

           KMMTTP hnuaia Mizoram chhunga kawngpui kal tur hi a tira km 99.83-a thui tura ruahman kha, kawng tawi zawk zawn that a awm nual avangin km 88-ah tihtawi a ni tawh a. Black top tur hi km 88 niin, hmun riatah lei dawh tur a ni.

           Kawng hi km 87 blacktop turah km 81.500 luan zawh tawh a ni a. Lei (bridge) pariat  dawh turah paruk  thawh mek a ni. A pumpuiin  hna zawng zawng 94.20% thawh zawh tawh ang a ni.

            He kawngpui sial meka kawngpui zau zawng hi metre 12 niin, blacktop chin hi metre 7 a ni a. An hmanraw phah zawng zawng (subgrade 500mm, GSB 300mm, WMM 250mm, DBM 70mm & BC 40mm) hi muk tha taka chil vek niin, lei lawng atanga blacktop chung ber thlengin kawngpui chhah zawng hi fit 2'2" a ni. 

               MJA te hian Lawngtlai District chhunga Hruitezawl khaw bul Chhimtuipui luia lung mak/lung mawi, Mara lam sawi dana 'Castle of Beino' tia hriat lar ni bawk chu tlawhin, khualzin hip tura theh lar leh hman a nih thei dan tur te an en nghal a. Chhimtuipui lui dunga lungpui lian leh mawi tak tak awm khawm chu hmuhnawm leh mit titlai tak a nih piah lamah, a lui dung boruak hrim hrim pawh chu hah tidam leh mi chhawk zangkhai thei tak a ni a. He lung awm khawm hian a bul hnai khuaa mite sawi danin thawnthu a neih nual bakah, a lui dunga hi lawnga leu vel nan leh a suar thenkhat lai chu rafting tih nan te pawh hman theih tur a ni a. Sawrkarin felfai taka ruahmanna siama a bawhzui chuan tourist destination tha leh lar tak ni thei turah an ngai a ni.

               

Lung mak hi Lawngtlai District leh Siaha District ramri lui, Chhimtuipuia awm niin, Siaha lam atang leh Lawngtlai lam atangin a kal theih ve ve ani.