MNF ten Mizo National Day an hmang

Zoram hmundang rualin, MNF Dist. Hqrs. Lawngtlai chuan nimin khan, Lawngtlai Bazar a an Office ah Mizo National Day, vawi 54-na an hmang .

               Pu Manghmunga Chinzah, President, MNF Dist. Hqrs. Lawngtlai chuan thusawiin, MNF chu a Mizo  hnam anga par kan chhuah ve theihna tur atana theihtawp chhuah a,  a sur a sa hnuaia lo bei tawh te, ram daia mahni inchhunglum pawh luahlum zo lova pil bo ta te, Mizo hnam leh ram tana penchhuak hnam pasalthate khan an lo tuar nasa em em a, heng mi hmasate tawrhna leh ram tana an inpeknate hi kan hriatreng a ngai a ni,  a ti.

MNF District President chuan hnam pasalthate khan an tum leh duhdan ang takin, zalenna  famkim hmu rih lo mah se, vawiin ni a hmasawnna kan ram in a kan hmuh zozaite hi MNF Hnam Sipaite sualchhuah liau liau a ni a. Mizo National day kan hman theihna tur atana kan ram leh hnam tana an thiltihte hi i hrereng ang u, kan ram leh hnam tan hian eng nge kan tih ve theih? tiin mahnia inzawt  chungzelin thiltha kan ram tan i ti zel ang u, a ti bawk.

Nimina Lawngtlai a  Mizo National Day hmanna hi,  Pu NC Nguntlunga, Treasurer, MNF Dist. Hqrs. in akaihhruaiin, Pu F. Hrangtukhuma, General Secretary, MNF Dist. Hqrs     chuan hunserh hmangin MNF Party mi engemawzat he hun ah hian an tel.