Mizote kutpui ropui ber Chapchar Kut 2020 chu March 6, Zirtawpni khan Lawngtlai DC Office tualah hlim taka hman a ni a. Laifate zinga mi hming tha , LADC-a Executive Secretary hlui, ziak mi ni bawk Dr R. Tintlunga Hnialum chu Kut Pa niin, Lawngtlai DC, Pi Shashanka Ala, chu Kut Thlengtu a ni.
Kut Pa, Dr R. Tintlunga Hnialum chuan Chapchar Kut chu hlimna kut a nih angin mipuite chu rilru inhawng tak chunga hlim taka kut turin a sawm a. Hmanlai hun atang tawhin khawvel hnam hrang hrangte'n kut chi hrang hrang an hmang thin a, Chapchar Kut pawh hi Mizote kut zinga chhawm nun zel niin, Kristian kan ni a ringtute chu chhang dawidim telh loh nen kan kut thin tur a ni, a ti a. Kut thupui "Zo nun ze mawi chawi san" tih chu aia upa zah thiam kawngah te, tlawmngaihnaah te, thu awihnaah te, 'sem sem dam dam, ei bil thi thi' tih theihna kawngah te a taka lan chhuahtir turin kal khawmte chu a sawm a ni.
Kut Thlengtu Lawngtlai DC chuan mipuite Kut chibai bukin, duhsakna a hlan a. Chapchar Kut chu hlimna ni a nih ang ngeia hlim tak leh nuam taka hmang tura sawmin, hlimhlawp bawl satliah mai lo va, Kut thupui nunpuitu ni theuh turin a chah.
Chapchar Kut Miss, Little Miss leh Mister thlan chu Phawngpui Photographers' Association kuta a dah angin, Chapchar Kut Miss 2020-ah H. Lalduhsangi, Vengpui chu thlan a ni a; 1st Runner Up-ah Zodinpuii, AOC Veng leh 2nd Runner Up-ah Rampan mawii, Thingkah te thlan an ni.
Kut ah hian hnam ziarang pholang thei zai leh lam bak ah programme chi hrang hrang telh niin, tualchhung zaithiam leh rampum huap a zaithiam lar ten kut chhimtute an awi bawk.
Tags
News