Covid 19 vangin Lawngtlai District leh ramdang inrinna khar a ni.

         Tunlaia khawvel pumin a buaipui Covid-19 hrileng chungchangah Lawngtlai DC chuan Lawngtlai District mipuite him nan theih tawpin hma a la chho mek a. Nimin March       ni 12 khan Mizoram sawrkar thu chhuak angin ram dang nena Lawngtlai District inkal pawhna ramrite kharna thupek a chhuah a, hemi bawhzui nan hian Lawngtlai DC Conference Hall-ah meeting a ko bawk.

      

         Lawngtlai DC & District Magistrate Pi Shashanka Ala, -in nimina CrPC section 144-na tlawh chhana thupek a chhuaha a lan dan chuan, Lawngtlai District huam chhunga Myanmar nena inkal pawhna - Zochachhuah, Laitlang, Archhuang, Saisihchhuah leh Hruitezawla mi te leh Bangladesh nena      inkal pawhna Parva khuaa mi te chu         khar vek tur a ni a,        mi tu pawh ramri    kana an chhuah emaw, an lo luh emaw khap tlat a ni.

           He thupek pawisa lova bawhchhiate chu IPC section 188-na hmangin thla khat lung in tantir leh Rs 200/- chawitira hrem an ni dawn a. He thupek an bawhchhiat avanga mihring mimal nun, hriselna leh himna atana a hlauhawm chuan kum khat lung in tantir leh Rs 1000/- thleng chawitira hrem theih an ni bawk.

             Nimin vek khan DC Conference Hall-ah District       Administration, police, tlawmngai pawl leh thu thar theh darhtute nen he thupek bawhzuia hma lak dan tur sawi ho a ni a. Ramri kana lut leh chhuak an awm loh nan a chunga tar lan khaw rukah te khian police duty pali  theuh dah ni se, anmahni tanpui turin Young Lai Association leh village council te ngen ni bawk se, tih a ni a. Hemi atan hian Lawngtlai District chhunga police an indaih loh avangin Lunglei atangin mi dang chah belh ani.

          Covid-19 vei an awm leh awm loh enfiah turin Archhuang, Zochachhuah leh Saisihchhuahah te medical team an inbun mek a. He hri vei an lo awm palh thulha a enkawlna tur isolation ward pawh District Hospital Lawngtlaiah ruahman fel tawh a ni a. Medical team te'n ramri hnaih khuaah te mipui zirtirna (awareness) an kalpui mek bawk.

             He'ng ruahmannate hi he natnain Lawngtlai District a lo luh lohna tur leh a lo thlen palh pawha rang taka hriat chhuaha enkawl thuai a nih theihna tura ruahman a ni a. District thuneitute chuan tu mah chi-ai lo tur leh sawrkar thu chhuak ngaichang a, zawm turin mipuite an ngen a. Ramri khar a nih rualin, ni tin mamawh chawk luh eng mah a buai phah dawn lo va, chu vang chuan     tul lova thil lei khawl vak emaw ching lo tur leh, hemi remchanga laa thil man tito lo    turin mipuite leh dawrkaite an ngen bawk.

             

District Administration chuan fimkhur thuhlaah, a theih chin chinah mipui pun khawm leh thil tih khawm buatsaih lo tur leh chuti anga tel tam lo turin District mipuite chu a ngenin, thu a rawn a ni.