Coronavirus chungchang vangin District Level Task Force an thukhawm

          Lawngtlai District Level Task Force on Coronavirus Outbreak chu nimin  khan  Addl DC Pu K. Laltlawmlova,  hovin a office chamber-ah an thu khawm.

          Member Secretary Dr Lalthlamuana, Chief Medical Officer chuan khawvel hmun thenkhata covid19 hri leng mek chungchang leh district level task force din a nih dan  a sawi fiah a. He hri leng laka Lawngtlai District a himna tura hma lak dan tur leh lo inven dan tur hrang hrang sawi ho a ni.

         Lawngtlai District hian Myanmar nen ramri thui tak an intawm avang leh khualzin vak velte he ramri pal tlanga District chhunga an lo luh theih avangin Saisihchhuah-ah Myanmar atanga khualzin lo lut turte lo enfiah tur medical team dah ni se, an ti a. Hei bakah hian ramri hnaih khuaahte mipui hrilh hriatna (public awareness) buatsaih a, ram dang atanga lo lut reng reng health worker hnena inhriattir a, lo enfiah zel tura hma lak ni se, an ti a. Covid19 chungchanga mipui an chi-ai loh nan District chhung khaw tinah hrilh hriatna hi kalpui tum a ni bawk.

        He hri leng enfiahna tur hmanraw hrang hrang hi National Health Mission hnuaia Integrated Disease Surveillance Programme (IDSP) atangin dawn a ni a. He'ng hmanruate  thut khawmnaah hian pho chhuah a ni bawk.

           Tun dinhmunah he hri leng hi Lawngtlai District-a a la luh loh thu leh ram thenawm Myanmar-ah pawh a vei an awm thawm hriat a la nih loh thu tar langin,  Lawngtlai District mipuite chu chi-ai lo turin a chah a ni.