CADC hnuaia village council inthlanpui leh LADC hnuaia Council Veng VC seat khat hnawh khah nana by-election chu tluang takin buatsaih a ni.
CADC-a village council 88-ah hian a duh apiangin an chuh theih general seat 428 leh hmeichhe tana hauh reserved seat 88, a vaiin seat 516 a awm a. Inthlan chuhtu candidate zawng zawng hi mi 972 an ni a. Vote nei mi 32,213 an awm. LADC hnuaia Council Veng village council-a term laklawhah elected member thi a awm avanga seat ruak pakhat hnawh khah nana by-election neihah hian inthlan chuhtu mi 2 (INC leh MNF candidate) awmin, voter 1,298 an awm a
CADC hnuaia polling station pariat (8) tih lohvah chuan tlai dar 4-ah poll khar vek a ni a. CADC hnuaia inthlan kalpuina polling station 82-a voter 31,112 awmah a zavaiin vote 26,915 tlain, vote tla zawng zawng hi 86.51% a ni a. LADC hnuaia Council Veng polling station-ah tlai dar 4-ah poll khar fel theih niin, voter 1,298 awmah vote 808 tlain, vote tla zawng zawng hi 62.25% a ni.
CADC hnuaia VC 88-a inthlanpuiah hian seat awm zawng zawng 516-ah Mizo National Front (MNF)-in seat 372 lain, khaw 65-ah hnehna an chang a; Bharatiya Janata Party (BJP) chuan seat 115 lain, khaw 16-ah hnehna an chang a; Independent candidate-te'n seat 27 lain, khaw 3-ah hnehna an chang a; Indian National Congress (INC)-in seat 2 an la a; chak ber awm lohna (no majority) khua 4 a awm bawk.
LADC hnuaia Council Veng VC seat khat hnawh khahna tura by-election buatsaihah chuan MNF candidate Vanlalduhenga thlan tlin a ni.
Tags
News