YLA Day Vawi 45-na, tangkai leh hlawk takin hman a ni.

        Mizoram chhim lama Tlawmngai pawl lian ber, Young Lai Association (YLA) din champha vawi 45-na chu nimin khan uar taka hman a ni.


           YLA Day hi Branch YLA te’n tul leh tha an tih angin an hmang a, Lawngtlai khawpui chhunga Branch YLA te chuan mi dang tana thil tha tih nan hmangin, YLA kumpuan bawhzui nan veng chhung thenfai hnatlang an thawk a; Branch thenkhat chuan infiamna leh intihhlimna neiin ruai nena Day lawmte pawh an awm. New Hmunlai Branch chuan Hmunlai leh Chawngte inkar kawng chhe zual lai an siam a, Lawngtlai-III Branch pawhin kawngpui chhe lai siam hna an thawk bawk.
   
           Central YLA President Pu J. Sangthangpuia chuan YLA Day thuchah siamin YLA Member-te chu faina lama hmalakna chak zawka kalpui tura ngenin, ramngaw leh nungcha humhalh kawngah te, environment vawnhim nan te theihtawp chhuah zel turin a chah a ni.

              LADC a  CEM Pu T. Zakunga pawhin YLA Member-te Day chibai bukin duhsakna a hlan a, YLA chu ram innghahna pawimawh, midang tana pawl ding, Lai fate tan innghahna bulpui a ni, a ti.

           YLA Day-ah hian Central YLA chuan kum tina an lo tih thin angin Lawngtlaia Damdawi in pathum leh Lairam Motherless Home-ah te thilpek an hlan a ni.

         
Central YLA General Secretary Pu J.H.Lalrindika report atanga a lan danin, YLA hian Sub-Hqrs pasarih leh Branch 108 a nei mek a, member Sing 4 vel an awm mek a ni