MNF hi Term khat an Sorkar a ngem tih mipuiin an thlir mek -Zodintluanga MPCC Treasurer

       
          Nimin  khan Lai District Congress Committee chuan General Assembly neiin Minister hlui pahnih, MPCC Treasurer Pu Zodintluanga MLA leh Pu C. Ngunlianchunga MLA te’n an hmanpui.

          LADC Hall-a he hun an hman hi Lai DCC President Pu J. Ropianga’n kaihruaiin, Pu Zodintluanga chuan, Congress sawrkar laia sawi rik pawh awm ngai lo, ‘Treasury-ah pawisa a awm lo, sawrkar hnathawkin hlawh an la thei lo’ tih te chu kum khat em pawh MNF an sawrkar hmaa sawi rik a ni chu a lungchhiatthlak hle a ni, a ti a. An Campaign au hla SEDP, in tinah Cheng nuai 3 sem a ni ang, an tih lah chu ‘Project Base-a kalpui a ni ang’ an ti leh a, a manganthlak hle a ni, a ti a. Chief Minister berin Mau leh Rua chu intodelh nana siam tum lovin amah inhaivurna atana a ruahman  leh zel te chuan MNF hi term khat an sawrkar ang em tih mipuite thlir ber a ni mek a ni, a ti.

           Lawngtlai West MLA, Pu C. Ngunlianchunga pawhin thu sawiin, MNF-in sawrkarna an lak avanga LADC-a Congress sawrkar thlak an lo tum ve rikngawt avanga mahni party chhuahsantu MDC mi 5 te chu an dinhmun chhuahsan duh si lova nihna duh, sawrkar tithuanawmtute hi nakum MDC inthlanah mipuite’n paihthla ngam se, a ti a. MNF-te rilru puthmang en hian ram aia mahni pumpui hmangaihtu an nih zia a lang  a ni, a ti.